قرار

قررت انى مش هشوفك و لا اتصل بيك او حتى ارد على مكالماتك لمدة اسبوع
عشان انت واحشنى قوى
و انا لازم اعلم نفسى..... ازاى ما توحشهاش

ملحوظة صغيرة: دى مش انا خالص

يوسف شاهين و العبارة

مات جو ............. مات يوسف شاهين فى نفس اليوم اللى شهدت فيه مصر الحكم الاسود ببراءة مالك عبارة الموت
مات الصوت الناطق بالحق و العدل و الحرية و ارتفع صوت الفساد و الظلم و قهر الغلابة
يا ترى دى صدفة و لا دا وصف دقيق للحالة اللى بقت بلدنا فيها
غياب الحق و علو الزيف و الظلم و استعباد الناس اللى ما لهاش ضهر
بس ربنا هوا الضهر و السند
سوال مجننى بجد للاخ ممدوح اسماعيل ...... انت بتنام ازاى بالليل ؟
بتحط راسك ازاى على المخدة و دم الناس دى كلها فى رقبتك؟ مش بس الدم فكرت مرة تسأل نفسك اللى ماتول دول سابو مين وراهم ؟
ام مكلومة فى ابنها اللى ممكن يكون وحيدها و اللى كان بيجرى عليها تقدر تواجه حرقت قلبها على ابنها باى ضمير
فكرت فى اللى اتيتمو و اللى اتخرب بيتهم من بعد اللى كان لهم وراح فى عبارتك؟
هوا انت مؤمن بربنا ويوم القيامة و انه فية حساب ؟
هتقول ايه لرب العالمين لما يسألك عن الناس دى ولا تكون فاكر انك تقدرتجيب محامى الشيطان بتاعك معاك هناك كمان
هناك يا سيدى لا ينفع مال و لا بنون الا من اتى الله بقلب سليم"
طيب و ان سلمنا ان الحكم من الناحية القانونية سليم و من الناحية الانسانية ؟ ايه ..... ما فيش اى مسوؤلية خاااالص كدا و لا كأن لك دخل بأى شيئ؟
اقول ايه حسبى الله و نعم الوكيل
حسبى الله و نعم الوكيل
لك الله يا مصر

تانى تانى
.......................... مافيش فايدة

قلبى عليكى يا بلدى انفطر

الهم محاوطكى
و حزنك تاعبكى
وليه مش قادرة تبكى
الاعيان خانوكى
سارقين طين ابوكى
لعدوك باعوكى و لايد الزمن
عروكى فى ميدانهم
ولا واحد أدانهم
و علو أدانهم و بقالهم جرس
جلادك محامى
و حاميكى حرامى
و باية ينفع كلامى
يا ساكنة الخرس

عبد الرحمن الابنودى