البيت مش بيتك

بالامس و لانى كنت فريسة للمل امسكت بريموت التليفزيون و اخذت اتجول بين المحطات المختلفة فاوقعنى حظى العاثر فى برنامج البيت بيتك و كانت الحلقة من تقديم الاستاذ تامربيه امين ولانى من الاصل مش شخصية تليفزيونية و لما ربنا بيكرمنى و اتفرج باتجنب قنوات الريادة المصرية منعا لحرقة الدم و ارتفاع الضغط و الواحد مش نااقص و الاخ تامر كان بيناقش مواضيع مختلفة لكن انا ركزت معاه قوى لما كان بيتكلم عن نصاب المنيب اللى نصب على الناس الغلابة و اخد الفلوس و هرب, و قد هالنى ما رايت من طريقة استفزازية يوجه بها الاخ تامر الكلام للمشاهدين فيقول : كام مرة قلنالكم ان مافيش حاجة اسمها توظيف اموال ؟ امتى هتفهموا ان الموضوع دا نصب و بعدين ترجعوا تشتكوا و تقولوا اتنصب علينا,ويساله الضيف تفتكر بعد التنويه دا الناس هتبطل ؟ فيرد بكل عجرفة ... طبعا لا مافيش فايده مش عارف نعمل معاهم ايه بس؟!! الاخ تامر كان ناقص يمسك عصايه و يخرج يمد بيها المتفرجين و بالذات ضحايا النصاب على رجليهم

لا اعلم ما كل هذا الكم من الصلف و الغرور اذى يتحدث به السيد تامر و يا ترى ايه سببه ؟ ليه شايف نفسه فوق الناس بيوجه الكلام من طبقة فووق مين اللى اداه الحق ده كلمة عايزه اقولهالك يا تامر بيه يا امين هناك شعره صغيرة بين الثقة بالنفس و الغرور و اعتقد ان هذه الشعرة قد قطعت حنانيك يا سيدى على اهل بلدك الغلابه الذين حرموا من ابسط حقوقهم فى معيشه ادمية و كان الاولى بك يا مثقف و متعلم اوى ان تساعد و تتفهم لا ان تهاجم و تعتلى منبر الخطابه و التانيب و اقترح عليك تغير اسم الحلقات التى تقدمها الى البيت بيت تامر امين علشان ما حدش فينا يعتبه و شكرا