حالة غريبة قوى بمر بيها من فترة, من حوالى سنتين انتابتنى فجاة حالة فزع شديدة تجاه عمرى و اصبحت اكره الاحتفال بعيد ميلادى بعد ما كنت بستناه مش بس عشان الهدايا و الذى منه لكن علشان اتواصل مع الاصدقاء و احس بحبهم و دفا العلاقات بينا..دلوقتى مش عاوزة حد يفكرنى بيه , زمان( مش زمان قوى يعنى) كنت بقول انى كبرت و ان ماحدش عاقل يحتفل بمرور سنة و زيادة عمرة سنة كاملة و اضحك مع اصحابى لما يكلمونى علشان يقولولى كل سنة و انتى طيبة و يسالونى جبتى التورتة ؟ فارد عليهم بهزار قصد كو القرص بتاعت طلعة كل سنة؟ اه جبتهاوهولع فيها ,بس و الله كله كان هزار و عمر الكلام ما كان ليه اى صدى جوا نفسى , لكن دلوقتى بجد بقيت بتضايق و بجد بستنى ان الاصحاب ينسوه و يروح من بالهم مش عايزة اسمع عنه اى حاجة ,و انا بسال هل اصدقائى اللى فوق الثلاثين زى كدا دا شعورهم هما كمان؟ انا حاسة انى قديييمة قوى و عندى مية سنة , مع انى و الله عندى اصحاب كتير فى العشرينات فرضهم عليه العمل بس بالرغم من فرق السن اللى بيوصل ساعات لفوق العشر سنين بس احنا فعلا اصحاب و مش بلاقى اى صعوبة فى الاندماج معاهم , ما انكرش انى صحيح ساعات بحس ان لهم مواضيع و دنيا مختلفة شويتين عنى!!!,و صحيح انهم ساعات كتيير بيكونوا طالبين نصيحة او بيفضفضوا معايا عن همومهم بس برضه اصحاب و بنخرج و نتفسح سوا و انا بسعد بالوقت معاهم , بس غير كدا دايما حاسة ان العمر ولى ومعدش فيه قد اللى راح و مهما اقول لنفسى انى ما كبرتش قوى كدا و ان دا تفكيرمش مظبوط ..الاقى برضه ان هى دى الفكرة المسيطرة يا ترى انتو كمان كدا و لا انا بس اللى حاسة بكدا؟ !!!
و مش عاوزة حد يقولى علشان الستات بيخافوا من السن و الكلام دا انا بتكلم من منظور انسانى , يعنى مشاعر يستوى فيها الرجل و المراة ,هل سن فوق الثلاثين مفزع للدرجة دى
No comments:
Post a Comment